ఆ నటిది అడ్డంగా కొల్లగొట్టేశారు!

భారతీయ కాలమానం ప్రకారం ఈ సోమవారం జరిగిన ఆస్కార్ అవార్డ్స్ వేడుక గురించి ఇంకా హాలీవుడ్ లో చర్చలు జరుగుతూనే ఉన్నాయి. అవార్డు పొందిన తారలు ఆనందంగా పార్టీలిచ్చుకుంటుంటే, అవార్డు దక్కనివారు విచారంలో ఉన్నారు. అవార్డు దక్కినా ఓకే దక్కకపోయినా ఓకే అని సరిపెట్టుకునే తారలూ ఉన్నారనుకోండి. ఆ సంగతలా ఉంచితే.. ఈ అవార్డ్ వేడుకలో పాల్గొన్న నటి, దర్శకురాలు లుపితా నియాంగో తెగ బాధపడిపోతోందట. ఆ బాధంతా అవార్డు కోసం కాదు. అవార్డు వేడుకకు తాను ధరించిన విలువైన డ్రెస్ పోయినందుకు.. ఆ విషయంలోకి వస్తే...

Lupita Nyong'o frock costs 93 lakhs

మామూలుగా ఆస్కార్ అవార్డ్ వేడుక అంటే.. అందాల భామలు వేసుకొచ్చే పొడవాటి గౌనుల గురించి పెద్ద డిస్కషన్ జరుగుతుంది. ఎప్పటిలానే ఈ ఏడాది కూడా కలర్ ఫుల్ గౌనుల్లో ఆకట్టుకున్నారు హాలీవుడ్ అతివలు. బ్లాక్ బ్యూటీ లుపితా నియాంగో తెల్లని పొడవాటి గౌను వేసుకొచ్చింది. ఆ గౌను ప్రత్యేకత ఏంటంటే, దాదాపు 6వేల అసలు సిసలైన ముత్యాలతో తయారు చేశారు. ఆ వేడుకలో ఈ గౌను గురించి చాలామంది చెప్పుకున్నారు. ఫంక్షన్ పూర్తయ్యాక తాను బస చేసిన హోటల్ గదికి వెళ్లి, కాసేపు విశ్రాంతి తీసుకుంది లుపితా. ఆ తర్వాత బయటికెళ్లిందట. వెళ్లేటప్పుడు వేరే గౌను వేసుకుని, ముత్యాల గౌనుని హోటల్ గదిలోనే పెట్టేసిందట. తిరిగొచ్చేసరికి ఆ గౌను కనిపించకపోవడంతో అమ్మడు కంగారు పడిపోయిందని సమాచారం. ఈ ఖరీదైన గౌనుని ఎవరో కొల్లగొట్టారని అర్థం చేసుకుని, పోలీసులకు ఫిర్యాదు చేసిందట. దాంతో ఖాకీబాబులు రంగంలోకి దిగి, లుపితా గౌను కనుగొనే పని మీద ఉన్నారు. ఇంతకీ ఈ గౌను విలువ ఎంతో తెలుసా? దాదాపు 95 లక్షలట. ఇంత ఖరీదు గల బట్టలు వాడుతోందంటే.. లుపితా రేంజ్ ఏంటో ఊహించవచ్చు.