విశ్వవిఖ్యాత నట సార్వభౌమ ఎన్టీఆర్ జీవిత చరిత్రతో తెరకెక్కుతోన్న 'ఎన్టీఆర్' సినిమాపై రోజురోజుకు అంచనాలు పెరిగిపోతున్నాయి. నందమూరి నటసింహం బాలకృష్ణ ఎంతో ప్రతిష్టాత్మకంగా తీసుకుని క్రిష్ దర్శకత్వంలో ఈ చిత్రాన్ని నిర్మించడంతో పాటు ఎన్టీఆర్ పాత్రను పోషిస్తున్నారు. కాగా ఎన్టీఆర్ పాత్రను బాలయ్య పోషిస్తోంటే, మరి బాలయ్య పాత్రను ఎవరు చేస్తారనే ఆసక్తి అందరిలో నెలకొంది. దీని గురించి ఓ సందర్భంలో బాలయ్యను అడిగితే... అది సస్పెన్స్ అని చెప్పారు. దాంతో ఎవరికి తోచినట్టు వారు ఊహించుకోవడం మొదలుపెట్టారు. కొంతమంది మోక్షజ్ఞ తో ఈ పాత్ర చేయిస్తారని మాట్లాడుకుంటున్నారు.
అయితే ఫిల్మ్ నగర్ లో హల్ చల్ చేస్తున్న వార్తల ప్రకారం బాలయ్య పాత్రను యంగ్ టైగర్ ఎన్టీఆర్ తో చేయించబోతున్నారనే వార్తలు వినిపిస్తున్నాయి. ఈ విషయాన్ని బయటపెట్టాలనుకోవడంలేదట. సస్పెన్స్ మెయింటెన్ చేసి, సర్ ప్రైజ్ ఇవ్వాలనుకుంటున్నారట. ఇదే కనుక నిజమైతే నందమూరి అభిమానుల ఆనందానికి హద్దే ఉండదని చెప్పొచ్చు. ఇంతకంటే పెద్ద సర్ ప్రైజ్ కూడా మరొకటి ఉండదు. మరి ఈ వార్తల్లో ఎంతవరకూ నిజముందో వేచిచూద్దాం.