మామ కోసం వెనక్కి తగ్గిన హీరో!

ఈ నెల 12న రజనీకాంత్ అభిమానులకు పండగ. ఎందుకంటే, ఆయన నటించిన తాజా చిత్రం 'లింగా' విడుదల కాబోతున్న రోజది. ఈ రోజు కోసం అభిమానులు ఎంతగా ఎదురు చూస్తున్నారో.. ట్రేడ్ వర్గాలు కూడా అంతే ఆసక్తిగా ఎదురు చూస్తున్నాయి. ఈ చిత్రం రికార్డ్ స్థాయి వసూళ్లు సాధించడం ఖాయమనే అంచనాలున్నాయి. అందుకే, ఈ చిత్రం విడుదల రోజున పోటీకి మరో చిత్రం విడుదల చేయడం రిస్క్ అవుతుందన్నది పలువురి అభిప్రాయం. కానీ, అదే రోజు రజనీకాంత్ అల్లుడు ధనుష్ నటించిన 'అనేగన్' విడుదలకు సిద్ధమవుతోంది. 'లింగా' విడుదల తేదీ ఖరారు కాకముందే.. 'అనేగన్' విడుదల తేదీ ఖరారయ్యింది. కానీ, ఇప్పుడు 'లింగా' విడుదల తేదీ ఖరారు కావడంతో ధనుష్ వెనక్కి తగ్గాలనుకుంటున్నాడట.

వరుస విజయాలతో తిరుగు లేని మాస్ హీరోగా దూసుకెళుతున్నాడు ధనుష్. ఇమేజ్ పరంగా మామకు తగ్గ అల్లుడు అనిపించుకున్నాడు. మరి.. మామ సినిమా విడుదలైన రోజున తన సినిమా విడుదల కాకూడదని ధనుష్ ఎందుకు కోరుకుంటున్నాడు? భయపడుతున్నాడా? అంటే.. అదేం కాదు. ఒకేసారి ఇద్దరు మాస్ హీరోల చిత్రాలు విడుదలైతే వసూళ్లు డివైడ్ అవుతాయి. అది రెండు చిత్రాలకూ శ్రేయస్కరం కాదని ధనుష్ భావించాడట. అందుకని, తన చిత్రం విడుదలను వాయిదా వేయాలని నిర్ణయించుకున్నాడట. వాస్తవానికి డిసెంబర్ నెల మిస్సయితే ధనుష్ కి జనవరిలో మంచి తేదీ, థియేటర్లు దొరకవు. ఎందుకంటే, ఈపాటికే జనవరిలో విడుదలయ్యే ఇతర స్టార్ హీరోల చిత్రాలకు థియేటర్లు కేటాయించబడ్డాయట.

సో... జనవరిలో కూడా 'అనేగన్' విడుదలయ్యే అవకాశం లేదు. ఫిబ్రవరిలోనే తెరకొచ్చే అవకాశం ఉందట. అయినా ధనుష్ ఏమాత్రం బాధపడటంలేదట. మామ కోసం ఆనందంగానే త్యాగం చేశాడని చెన్నయ్ టాక్.

Dhanush 'Anegan' not in December