'కత్తి' 31న ఎందుకు రావడంలేదు?

విజయ్, సమంత జంటగా మురుగదాస్ దర్శకత్వంలో రూపొందిన తమిళ చిత్రం 'కత్తి' ఈ దీపావళికి విడుదలై, భారీ వసూళ్లు సాధిస్తూ, విజయథంలో దూసుకెళుతోంది. విజయ్, మురుగదాస్ కలయికలో రూపొందిన 'తుపాకీ'కన్నా ఈ చిత్రం మరింత విజయాన్ని సొంతం చేసుకుంది. ఈ ఇద్దరిదీ క్రేజీ కాంబినేషన్ కాబట్టి, నిర్మాణంలో ఉన్నప్పుడే పలువురు తెలుగు నిర్మాతలు అనువాద హక్కులు దక్కించుకోవడం కోసం పోటీ పడ్డారు. చివరికి ఫ్యాన్సీ రేటు ఇచ్చి 'ఠాగూర్' మధు ఈ చిత్రం అనువాద హక్కులు దక్కించుకున్నారు. ఈ నెల 24న తెలుగు వెర్షన్ పాటలను, 31న చిత్రాన్ని విడుదల చేయాలనుకున్నారు. కానీ, 31న ఈ చిత్రం రావడంలేదు. దీని గురించి ఫిల్మ్ నగర్ లో రకరకాలుగా అనుకుంటున్నారు. ఆ వివరాల్లోకి వెళితే...

తమిళంలో ఈ చిత్రం ఘనవిజయం సాధించడానికి కారణం విజయ్ నటన, సమంత అందచందాలు, అభినయం, కథ, కథనాలు, శక్తిమంతమైన మాటలు, మురుగదాస్ టేకింగ్. ఇక.. మిగతా శాఖల పనితీరు, నటీనటుల అభినయం కూడా ఈ చిత్రవిజయానికి దోహదపడ్డాయి. ఈ చిత్రకథ ఏ భాషకైనా నప్పుతుంది కాబట్టి, ఈ కథతో సినిమా తీస్తే బాగుంటుందని 'ఠాగూర్' మధు ఆలోచనలో పడ్డారట. ఇక్కడి మాస్ హీరోలతో ఈ సినిమా తీస్తే.. బాగుంటుందన్నది ఆయన అభిప్రాయం అని తెలిసింది. పవన్ కళ్యాణ్, మహేష్ బాబులాంటి వాళ్లు ఈ సినిమా చేస్తే దీని రేంజ్ ఎక్కడో ఉంటుందని, ఖచ్చితంగా బ్లాక్ బస్టర్ అవుతుందని 'కత్తి' తమిళ వెర్షన్ చూసినవాళ్లు అనుకుంటున్నారు. మరి.. అనువాద చిత్రం విడుదల తేదీ గురించి ఇంకా మధు ఒక నిర్ణయానికి రాలేదు కాబట్టి, తెరవెనక ఈ చిత్రాన్ని రీమేక్ చేసే ప్రయత్నాలే జరుగుతున్నాయో ఏమో?

Will 'Kaththi' to be remade in Telugu?