రాంచరణ్ లెక్క తప్పలేదు.. అందుకే నో డిస్పాయింట్ మెంట్!

మెగా పవర్ స్టార్ రాంచరణ్ టాప్ డైరెక్టర్ సినిమాని మిస్ చేసుకున్నాడు. ఆ సినిమా ఇటీవల విడుదలై విజయవంతంగా ముందుకు దూసుకెళుతోంది. దాంతో... అర్రె... ఆ సినిమా వదులుకుని తప్పు చేసానా, ఆ సినిమా చేసి ఉంటే బాగుండేది కదాని రాంచరణ్ ఫీలవుతున్నాడేమోనని జనాలు మాట్లాడుకుంటున్నారు. కానీ అలాంటిదేం లేదు. ఆ సినిమా వదులుకుని రాంచరణ్ చాలా మంచి పని చేసాడని పరిశీలకులు అంటున్నారు. రాంచరణ్ లెక్క అసలు తప్పలేదు, అందుకే డిస్పాయింట్ అవ్వాల్సిన అవసరంలేదు అని కూడా అంటున్నారు. ఇంతకీ అసలు రాంచరణ్ వదులుకున్న సినిమా ఏంటీ అనే వివరాల్లోకి వెళితే...

స్టార్ డైరెక్టర్ మణిరత్నం దర్శకత్వంలో తెరకెక్కిన 'నవాబ్' సినిమా ఇటీవల విడుదలయ్యింది. తమిళ్ ఆడియన్స్ తో పాటు తెలుగు ఆడియన్స్ కూడా ఈ సినిమా పట్ల ఫిదా అయిపోయారు. కాగా ఈ సినిమాని రాంచరణ్ చేయాల్సి ఉంది. స్టోరీ లైన్ విన్న రాంచరణ్ వెంటనే ఈ సినిమా చేస్తానని మణిరత్నం కి చెప్పలేకపోయాడు. ఎందుకంటే తన క్యారెక్టర్ అంత ఇంప్రసివ్ గా లేదని ఫీలయ్యాడట రాంచరణ్. అందుకే ఆ సినిమాకి నో చెప్పేసాడు. బోయపాటి శ్రీను దర్శకత్వంలో సినిమా అంగీకరించాడు. రాంచరణ్ వదులుకున్న పాత్రని శింబు చేసాడు. నిజం చెప్పాలంటే ఆ పాత్ర నలుగురిలో నారాయణలా ఉండటం, నెగటివ్ షేడ్ కావడంతో చరణ్ ఇమేజ్ కి సూట్ అయ్యేది కాదు. పైగా ఈ పాత్ర వల్ల చరణ్ కి పెద్దగా ఒరిగేది ఏమీ లేదు. కాబట్టి 'నవాబ్' వదులుకున్నందుకు రాంచరణ్ అసలు నిరాశపడాల్సిన పనిలేదని పరిశీలకులు అంటున్నారు. సో... రాంచరణ్ లెక్క తప్పలేదు కదా... కరెక్ట్ డెసిషన్ తీసుకున్నట్టే కదా...!