సర్దార్ గబ్బర్ సింగ్ పంచాయితీ... పవన్ కళ్యాణ్ స్పందిస్తాడా?

పవర్ స్టార్ పవన్ కళ్యాణ్ 'సర్దార్ గబ్బర్ సింగ్' చిత్రం మెగాభిమానులను నిరాశపరచడంతో పాటు ఈ సినిమాని పంపిణీ చేసిన డిస్ట్రిబ్యూటర్స్ కి నష్టాలను మిగిల్చింది. ఈ నష్టాలను పూడ్చుకోవడానికి అప్పట్లో డిస్ట్రిబ్యూటర్స్లు నిర్మాత శరత్ మరార్ తో ఓ మీటింగ్ ఏర్పాటు చేసుకున్నారట. ఈ మీటింగ్ లో పవన్ కళ్యాణ్ ప్రస్తుతం చేస్తున్న 'కాటమరాయుడు' చిత్రం పంపిణీ హక్కులను 'సర్దార్ గబ్బర్ సింగ్' వల్ల నష్టపోయిన డిస్ట్రిబ్యూటర్స్ కి ఇవ్వడానికి నిర్మాత శరత్ మరార్ అంగీకరించారనే వార్తలు ఉన్నాయి. దాంతో 'సర్దార్ గబ్బర్ సింగ్' తో పోగొట్టుకున్న డబ్బును 'కాటమరాయుడు' చిత్రంతో పూడ్చుకోవచ్చని ఫిక్స్ అయిపోయారట డిస్ట్రిబ్యూటర్స్.

కాగా తాజా వార్తల ప్రకారం 'కాటమరాయుడు' రిలీజ్ దగ్గర పడుతుండటంతో ఈ చిత్రం హక్కులను తమకు ఇవ్వాల్సిందిగా కోరుతూ 'సర్దార్ గబ్బర్ సింగ్' డిస్ట్రిబ్యూటర్స్ నిర్మాత శరత్ మరార్ ని కలిసారట. కానీ శరత్ మరార్ ఇందుకు సుముఖంగాలేరని సమాచారమ్. 'కాటమరాయుడు' బడ్జెట్ ని మనసులో పెట్టుకుని ఇప్పుడు ఈ హక్కులు 'సర్దార్ గబ్బర్ సింగ్' డిస్ట్రిబ్యూటర్స్ కి ఇస్తే తాము నష్టపోవాల్సి వస్తుందని భావిస్తున్నారట శరత్ మరార్. కొత్తవారికి 'కాటమరాయుడు' హక్కులు ఇవ్వాలనుకుంటున్నారట. దాంతో 'సర్దార్ గబ్బర్ సింగ్' ని డిస్ట్రిబ్యూట్ చేసిన ముత్యాల రాందాస్, సంపత్ ఈ రోజు మీడియా సమావేశం ఏర్పాటు చేసి, తమకు న్యాయం జరిపించాల్సిందిగా నిర్మాత శరత్ మరార్ ని, పవన్ కళ్యాణ్ ని కోరారు. మీడియా సమావేశం కాబట్టి ప్రాబ్లమ్ బహిరంగమవుతుంది. అప్పుడు శరత్ మరార్, పవన్ కళ్యాణ్ వీరితో చర్చించి ప్రాబ్లమ్ క్లియర్ చేసుకుంటారనేది ఈ డిస్ట్రిబ్యూటర్స్ ఆశ.అయ్యుంటుంది. మరి శరత్ మరార్, పవన్ కళ్యాణ్ స్పందిస్తారా... వేచి చూద్దాం.