ఎన్టీఆర్ విషయంలో నిప్పు లేనిదే పొగ ఎలా వచ్చిందబ్బా?

ఎన్టీఆర్ ఎవరో నాకు తెలీదు. నేను ఎప్పుడు అతనిని కలవలేదు అని కోలీవుడ్ స్టార్ డైరెక్టర్ హరి ఓ స్టేట్ మెంట్ ఇచ్చాడనే వార్త బయటికి రావడం... సోషల్ మీడియాలో పెద్ద ఎత్తున హల్ చల్ చేయడం తెలిసిన విషయమే. ఎన్టీఆర్ అభిమానులు అయితే ఈ డైరెక్టర్ పై కారాలు, మిరియాలు నూరారు. అయితే ఈ డైరెక్టర్ గారు తాజాగా ప్లేటు ఫిరాయించారు. ''నేను అసలు అలా అనలేదు... ఎన్టీఆర్ నాకు తెలియకపోవడమేంటీ.. ఆ మధ్య ఎన్టీఆర్ కి ఓ కథ కూడా చెప్పాను'' అనేసాడు. దాంతో నిప్పు లేనిదే పొగ ఎలా వచ్చిందబ్బా... ఈ డైరెక్టర్ నోరు జారకపోతే ఆ మాటలు బయటికి ఎలా వచ్చాయి అని జనాలు తెగ ఆశ్చర్యపోతున్నారు. ఎన్టీఆర్ అభిమానులైతే... ఈ డైరెక్టర్ మాటలకి కాస్త కూల్ అవుతున్నారు. తమ హీరో గురించి అవాకులు చెవాకులు పేలితే ఊరుకుంటామా.. ఏదో దిద్దుబాటు చర్య చేసాడు కాబట్టి ఈ డైరెక్టర్ ని వదిలేస్తున్నాం అని కొంతమంది అభిమానులు అంటున్నారు.

ఏదో ఒక సిట్యువేషన్ లో నోరు జారినప్పటికీ, 'సింగమ్ 3' రిలీజ్ దగ్గరపడుతోంది కాబట్టి, రేగిన వివాదానికి ఫుల్ స్టాప్ పెట్టకపోతే దెబ్బయిపోతామని గ్రహించినట్టున్నాడు డైరెక్టర్ హరి. అందుకే ఏ మాత్రం సంకోచించకుండా ''ఎన్టీఆర్ 'టెంపర్' సినిమాని రెండుసార్లు చూసాను. ఆయన సినిమాకి దర్శకత్వం వహించాలనేది నా కోరిక. ఎన్టీఆర్ నటన అంటే నాకు చాలా ఇష్టం. అద్భుతంగా నటిస్తాడు'' అని చెప్పాడు. హరి ఇచ్చిన ఈ వివరణ రేగిన వివాదానికి ఫుల్ స్టాప్ పడేలా చేస్తుందని ఊహించవచ్చు. హరి చాలా తెలివిగలవాడే...!