9 యేళ్ల గ్యాప్ తర్వాత మెగాస్టార్ చిరంజీవి ఎంతో ఆలోచించి, ఎన్నో కథలు విని ఫైనల్ గా చేసిన చిత్రం 'ఖైదీ నెం.150'. ఆయన జడ్జిమెంట్ పక్కగా కరెక్ట్ అని ఈ సినిమా విజయం నిరూపించింది. ఇది తమిళ్ చిత్రం 'కత్తి' కి రీమేక్. చిరంజీవి ఈ సినిమా చేసి విజయం సాధించడంతో, ఇప్పుడీ సినిమాపై బాలీవుడ్ హీరోల కన్ను పడిందని తెలుస్తోంది. ఈ సినిమా రీమేక్ లో నటించడానికి బాలీవుడ్ స్టార్ హీరో గ్రీన్ సిగ్నల్ ఇచ్చినట్టు తెలుస్తోంది. ఆ వివరాల్లోకి వెళితే...
తమిళ్ వెర్షన్ 'కత్తి' లో విజయ్ హీరోగా నటించాడు. ఏ.ఆర్.మురుగదాస్ దర్శకత్వంలో ఈ చిత్రం రూపొందింది. తెలుగు వెర్షన్ చిరంజీవి హీరోగా వి.వి.వినాయక్ దర్శకత్వంలో తెరకెక్కింది. ఈ రెండు వెర్షన్స్ సూపర్ డూపర్ హిట్ అయిన నేపధ్యంలో హృతిక్ రోషన్ ఈ సినిమా రీమేక్ లో నటించడానికి గ్రీన్ సిగ్నల్ ఇచ్చాడట. ఏ.ఆర్.మురుగదాస్ దర్శకత్వంలోనే హిందీ వెర్షన్ రూపొందనుంది. ఆల్ రెడీ హృతిక్, ఏ.ఆర్.మురుగదాస్ మధ్య చర్చలు కూడా జరిగాయట. బాలీవుడ్ ఆడియన్స్ ని దృష్టిలో పెట్టుకుని స్ర్కిఫ్ట్ కి కొన్ని మార్పులు చేయిస్తున్నాడట మురుగదాస్. తమిళ్ వెర్షన్ లో సమంత హీరోయిన్ గా నటించింది. తెలుగు వెర్షన్ లో కాజల్ అగర్వాల్ హీరోయిన్ గా నటించింది, మరి హిందీ వెర్షన్ లో హీరోయిన్ గా నటించే అవకాశం ఎవరిని వరిస్తుందో వేచి చూద్దాం.