ఇద్దరు వివిఐపి తాతయ్యలు నారా చంద్రబాబునాయుడు, నందమూరి బాలకృష్ణ ముద్దుల మనవడు నారా దేవాన్ష్ 'పైసా వసూలు' సెట్ లో సందడి చేయడం, ఆ వీడియో బయటికి రావడంతో నందమూరి అభిమానులు ఆ వీడియోని షేర్ చేసి తెగ మురిసిపోతున్నారు. సందర్భం వచ్చినప్పుడల్లా మనవడు దేవాన్ష్ గురించి బాలయ్య బోల్డన్ని కబుర్లు చెబుతుంటారు. బాలయ్య మెడలో పులిగోరు చూడగానే దేవాన్ష్ కేరింతలు కొడతాడట. అలాగే చంద్రబాబునాయుడు గెడ్డంతో ఆడుకుంటాడట ఈ బుడతడు. ఈ విషయాలన్నీ బాలయ్య చెప్పినవే.
'పైసా వసూలు' సాంగ్ మేకింగ్ వీడియోని ఈ చిత్రం యూనిట్ రిలీజ్ చేసింది. ఈ పాటను చిత్రీకరిస్తున్నప్పుడు నారా దేవాన్ష్ ఈ సెట్ లో సందడి చేసాడు. బాలయ్య చిందేస్తుంటే, దేవాన్ష్ ఎంజాయ్ చేసాడు, దేవాన్ష్ కూడా డ్యాన్స్ చేసాడు. ఇది చూసి బాలయ్య తెగ ముచ్చటపడిపోయాడు. బాలయ్య సతీమణి వసుంధర, కూతుళ్లు కూడా ఈ సెట్ లో సందడి చేసారు. మొత్తం మీద 'పైసా వసూలు' మేకింగ్ వీడియో ఫుల్ హల్ చల్ చేస్తోంది.