యూత్ కింగ్ అక్కినేని అఖిల్ మూడో సినిమా 'తొలిప్రేమ' ఫేం వెంకీ అట్లూరి దర్శకత్వంలో తెరకెక్కుతోన్న విషయం తెలిసిందే. ఈ చిత్రానికి 'Mr. మజ్ను' టైటిల్ ని ఫిక్స్ చేసారు. రొమాంటిక్ ఎంటర్ టైనర్ గా తెరకెక్కుతోన్న ఈ చిత్రంలో 'సవ్యసాచి' ఫేం నిధి అగర్వాల్ కథానాయికగా నటిస్తోంది. శ్రీవెంకటేశ్వర సినీ చిత్ర ఎల్ఎల్పి పతాకంపై నిర్మాత బి.వి.ఎస్.ఎన్.ప్రసాద్ ఈ చిత్రాన్ని నిర్మిస్తున్నారు.
అఖిల్ తాతగారు డా.అక్కినేని నాగేశ్వరరావు 'లైలా మజ్ను'గా, తండ్రి కింగ్ నాగార్జున 'మజ్ను'గా నటించారు. ఇప్పుడు అఖిల్ అక్కినేని 'Mr. మజ్ను'గా అందర్నీ అలరించడానికి సిద్ధమయ్యారు. ఈ చిత్రానికి సంబంధించిన ఫస్ట్లుక్ టీజర్ను నటసామ్రాట్ డా. అక్కినేని నాగేశ్వరరావు జయంతి సందర్భంగా విడుదల చేశారు. ఈ టీజర్లో యూత్ కింగ్ అఖిల్ అక్కినేని స్టైలిష్ లుక్తో ఎంట్రీ ఇవ్వగా, 'దేవదాసు మనవడో.. మన్మథుడికి వారసుడో, కావ్యంలో కాముడో.. అంతకన్నా రసికుడో..' అంటూ బ్యాక్గ్రౌండ్లో వచ్చే టైటిల్ సాంగ్తో టీజర్ మొదలవుతుంది. 'ఎక్స్క్యూజ్మి మిస్.. ఏమిటో ఇంగ్లీష్ భాష, దేన్నయితే మిస్ చేయకూడదో దాన్నే మిస్ అన్నారు' అంటూ అఖిల్ అక్కినేని చెప్పే డైలాగ్ యూత్కి బాగా కనెక్ట్ అయ్యేలా ఉంది. ఈ చిత్రంలో అఖిల్ అక్కినేని లుక్, స్టైల్, పెర్ఫార్మెన్స్ అందర్నీ ఆకట్టుకుంటుందనడంలో ఎలాంటి సందేహం లేదు.
శరవేగంగా షూటింగ్ జరుపుకుంటున్న ఈ చిత్రాన్ని డిసెంబర్లో విడుదల చేసేందుకు ప్లాన్ చేస్తున్నారు.