తమిళంలో రూపొందిన 'జిగర్తాండా' సినిమా ఏ రేంజ్ విజయాన్ని అందుకుందో ప్రత్యేకంగా చెప్పక్కర్లేదు. బాబిసింహా, సిద్ధార్ద్ కాంబినేషన్ లో కార్తిక్ సుబ్బరాజు దర్శకత్వంలో తెరకెక్కిన ఈ సినిమా తెలుగులో వరుణ్ తేజ్, అధర్వ కాంబినేషన్ లో హరీష్ శంకర్ దర్శకత్వంలో 'గద్దలకొండ గణేష్' గా రీమేక్ అయ్యింది. తెలుగులో కూడా చక్కటి విజయాన్ని అందుకున్న ఈ సినిమా హిందీలో కూడా రీమేక్ కానుందనే వార్తలు గత కొంతకాలంగా ప్రచారమవుతున్నాయి.
తాజా వార్తల ప్రకారం హిందీ రీమేక్ కి రంగం సిద్ధమవుతోందని తెలుస్తోంది. అజయ్ దేవగన్, పర్హాన్ అక్తర్ కాంబినేషన్ లో ఈ సినిమా తెరకెక్కనుందని, మిల్క్ బ్యూటీ తమన్నాని హీరోయిన్ గా తీసుకున్నారని బాలీవుడ్ టాక్. ప్రస్తుతం 'బోలే చుడియా' హిందీ సినిమాతో బాలీవుడ్ లో బిజీగా ఉంది తమన్నా. తాజాగా 'జిగర్తాండా' హిందీ రీమేక్ కి కూడా కమిట్ అయితే... బాలీవుడ్ లో పాగా వేయాలనుకుంటున్న తమన్నా కల కొంతమేర నెరవేరినట్టు అవుతుంది. మరి ఈ బంపర్ ఆఫర్ ని తమన్నా ఎలా వర్కవుట్ చేసుకుంటుందో వేచిచూద్దాం.