'ఆర్ఆర్ఆర్'(రౌద్రం ర‌ణం రుధిరం) టీం నుంచి ఎప్పుడెప్పుడు ఆ మాట వింటామా అని ఎన్టీఆర్ ఫ్యాన్స్, చరణ్ ఫ్యాన్స్ తో పాటు సినీప్రియులు ఎదురుచూస్తున్నారు. అందరూ ఎదురుచూస్తున్న ఈ సినిమా రిలీజ్ డేట్ ని ఈ రోజు అఫీషియల్ గా ప్రకటించి ఎదురుచూపులకు ఫుల్ స్టాప్ పెట్టారు డైరెక్టర్ రాజమౌళి.
ఈ యేడాది దసరా పండుగ కానుకగా అక్టోబర్ 13న ఈ సినిమా ప్రపంచ వ్యాప్తంగా ఘనంగా విడుదలకానుంది. తెలుగుతో పాటు హిందీ, త‌మిళ, మ‌ల‌యాళ, క‌న్న‌డ భాష‌ల్లో ఈ సినిమా విడుదలవుతోంది.
మ‌న్యంవీరుడు అల్లూరి సీతారామరాజు పాత్ర‌లో మెగాప‌వ‌ర్‌స్టార్ రామ్‌చ‌ర‌ణ్‌, గోండు వీరుడు కొమురం భీమ్ పాత్ర‌లో యంగ్ టైగర్ ఎన్టీఆర్ న‌టిస్తున్న ఈ చిత్రంలో బాలీవుడ్ స్టార్స్ అజ‌య్ దేవ‌గ‌ణ్‌, ఆలియా భ‌ట్‌, కోలీవుడ్ విల‌క్ష‌ణ న‌టుడు స‌ముద్ర‌ఖ‌ని, హాలీవుడ్ స్టార్ అలిస‌న్ డూడీ స‌హా ప్ర‌ముఖ తారాగ‌ణమంతా న‌టిస్తున్నారు. ఫిక్ష‌న‌ల్‌ పీరియాడిక్ యాక్ష‌న్ ఎంట‌ర్‌టైన‌ర్‌గా రూపొందుతోన్న ఈ సినిమాలో కొమురం భీమ్, అల్లూరి సీతారామరాజు స్వాతంత్ర్యం కోసం పోరాటాన్ని ఎలా ప్రారంభించార‌నేదే క‌థాంశం.
ద‌ర్శ‌క‌ధీరుడు ఎస్‌.ఎస్‌.రాజమౌళి డైరెక్ష‌న్‌లో డి.పార్వ‌తి స‌మ‌ర్ప‌ణ‌లో డి.వి.వి.ఎంట‌ర్‌టైన్‌మెంట్స్ బ్యాన‌ర్‌పై డి.వి.వి.దాన‌య్య ఈ భారీ బ‌డ్జెట్ చిత్రాన్ని అన్‌కాంప్ర‌మైజ్డ్‌గా నిర్మిస్తున్నారు.
