గోవిందుడు అందరి వాడేలే' టీజర్ ఆవిష్కరణ విశేషాలు

''చిరంజీవితో ఓ యాడ్ షూట్ చేసినప్పుడు, నాకు ఆయన వాడిన ల్యాండ్ క్రూజర్ కార్ బాగా నచ్చింది. ఆ విషయాన్ని ఆయనతో అన్నాను. ఓ రోజు ఆయన నాకు ఫోన్ చేసి రమ్మని ఆ కారుని బహుమతిగా ఇచ్చారు. నేనది ఊహించలేదు'' అని కృష్ణవంశీ చెప్పారు. రామ్ చరణ్, కాజల్ అగర్వాల్ జంటగా కృష్ణవంశీ దర్శకత్వంలో బండ్ల గణేష్ నిర్మిస్తున్న చిత్రం 'గోవిందుడు అందరివాడేలే'. ఈ చిత్రం టీజర్ ఆవిష్కరణ హైదరాబాద్ లోని నానక్ రామ్ గూడాలో గల రామానాయుడు స్టూడియోలో జరిగింది. పరుచూరి వెంకటేశ్వరరావు టీజర్ ని ఆవిష్కరించారు.

ఈ సందర్భంగా కృష్ణవంశీ మరిన్ని విశేషాలు చెబుతూ- ''గత మూడు, నాలుగేళ్లుగా కెరీర్ పరంగా కొంచెం డౌన్ లో ఉన్నాను. కానీ, ఎదురీదాలని నిర్ణయించుకున్నాను. ఈ సినిమా కోసం రామ్ చరణ్ ని కలిసినప్పుడు నాకంత ఆత్మవిశ్వాసం లేదు. కానీ, తను తన కుర్చీని నాకిచ్చి, నాకెదురుగా కూర్చున్నాడు. నాకు చాలా మర్యాద ఇచ్చాడు. ఇక, చిరంజీవి అయితే నాకు వెయ్యేనుగుల బలం ఇచ్చారు. రామ్ చరణ్ తప్పకుండా సినిమా చేస్తాడని, కథ చెప్పమని ఆయన అన్నారు. నేనెంతోమంది ఆర్టిస్టులకు అవకాశం ఇచ్చాను కానీ, నాకెవరూ అవకాశం ఇవ్వలేదు. నాకు అవకాశం ఇచ్చిన ఆర్టిస్ట్ రామ్ చరణ్. తను సంస్కారవంతుడు. లండన్ లో ఉండే ఓ యువకుడు ఆంధ్ర ప్రదేశ్ లోని ఓ గ్రామంలో తన మూలాలను వెతికే కథ ఇది. రామ్ చరణ్ తీరుని క్షుణ్ణంగా పరిశీలించి, చేసిన సినిమా ఇది. గత ఐదేళ్లుగా యువన్ శంకర్ రాజా కోసం ఎదురు చూస్తున్నాను. చివరికి ఈ సినిమాకి కుదిరింది. ఈ చిత్రానికి సమీర్ రెడ్డి ఓ పిల్లర్ లాంటివాడు. మరో 50 ఏళ్ల వరకు నిలిచిపోయే సినిమా ఇది'' అని చెప్పారు.

రామ్ చరణ్ మాట్లాడుతూ - ''తెలుగు సినిమా పరిశ్రమకు కృష్ణవంశీ ఓ ఎస్సెట్. 'మగధీర'వంటి శక్తిమంతమైన చిత్రం చేసిన తర్వాత ఓ సున్నితమైన సినిమా చేయాలనుకున్నాను. అప్పుడే కృష్ణవంశీని కలిశాను. నాతో సినిమా చేయమని కోరాను. కుటుంబ కథా చిత్రం చేయాలనుకున్నాను. అది కూడా కృష్ణవంశీతోనే చేయాలనుకున్నాను. అది నెరవేరింది. ఈ కథకు మంచి తారాగణం చాలా ముఖ్యం. ప్రకాశ్ రాజ్, జయసుధ ఈ చిత్రం చేయడంతో ఓ పరిపూర్ణత సంతరించుకుంది. కాజల్ అగర్వాల్ తో నాకిది మూడో సినిమా. ఇక, 'ఆనంద్', 'గోదావరి' చిత్రాలు చూసిన తర్వాత కమలినీ ముఖర్జీ కి అభిమాని అయ్యాను. తను ఈ సినిమాలో నటించడం ఆనందంగా ఉంది. ఈ చిత్రవిజయంపై నాకు పూర్తి నమ్మకం ఉంది'' అన్నారు.

ప్రకాష్ రాజ్ మాట్లాడుతూ - ''కృష్ణవంశీతో కొంత విరామం తర్వాత చేసిన సినిమా ఇది. ఈ సినిమాలో నటించడం నా అదృష్టంగా భావిస్తున్నాను. మానవీయ విలువల నేపథ్యంలో సాగే కథ ఇది. తల్లిదండ్రులను ఏ విధంగా చూసుకోవాలో తెలియజేసే సినిమా. 'చిరుత'కు ముందు నుంచే నాకు రామ్ చరణ్ తెలుసు. తను సినిమా సినిమాకీ ఎదుగుతున్నాడు. చరణ్ ని కొత్త కోణంలో చూపిస్తున్నాడు కృఫ్ణవంశీ'' అని తెలిపారు.

బండ్ల గణేష్ మాట్లాడుతూ - ''ఈ చిత్రం విడుదల తర్వాత తెలుగు పరిశ్రమ కృష్ణవంశీని చూసి గర్వపడుతుంది. ప్రతి ఒక్కరూ ఈ సినిమాని ఓన్ చేసుకుంటారు. యువన్ శంకర్ అద్భుతమైన పాటలు ఇచ్చాడు'' అన్నారు.

ఇంకా ఈ వేడుకలో పరుచూరి వెంకటేశ్వరరావు, కాజల్ అగర్వాల్, కమలినీ తదితరులు పాల్గొన్నారు.

Govindudu Andarivadele is releasing on oct1st