అతన్ని నయనతార మళ్లీ తిరస్కరించింది!

నయనతార తమిళంలో మోస్ట్ వాంటెడ్ హీరోయిన్. సీనియర్ హీరోలు, కుర్ర హీరోలు ఆమెతో జతకట్టడానికి సిద్ధపడుతున్నారు. అందుకే, రెండు నుంచి మూడు కోట్ల వరకూ పారితోషికం డిమాండ్ చేస్తోంది. ఏ సినిమాకి అవకాశం వచ్చినా దాదాపు కాదనుకుండా ఒప్పేసుకుంటోంది. కానీ, ఒకే ఒక్క చిత్రాన్ని మాత్రం తిరస్కరించిందట. ఆ చిత్రంలో నటించబోయే హీరోని నయనతార తిరస్కరించడం ఇది రెండో సారి అని సమాచారం. ఆ హీరో ఎవరు? ఎందుకు తిరస్కరించింది? అనే విషయంలోకి వస్తే..

ఆ హీరో ఎవరో కాదు... 'అపరిచతుడు' విక్రమ్. కథానాయిక అయిన కొత్తల్లో నయనతారకు విక్రమ్ సరసన నటించే అవకాశం వచ్చిందట. అదే సమయంలో వేరే చిన్న హీరో సరసన సినిమా కమిట్ అయ్యిందట నయనతార. ఆ సినిమా వదులుకుని, విక్రమ్ సినిమాకి డేట్స్ ఇవ్వమని ఆ చిత్ర దర్శక, నిర్మాతలు నయనతారను కోరితే 'అలా కుదరదు' అంటూ ఆ చిత్రాన్ని తిరస్కరించిందట. ఇన్నేళ్ల తర్వాత మళ్లీ ఇప్పుడు విక్రమ్ సరసన నటించే అవకాశం వచ్చిందట నయనతారకు. ఈసారి కూడా అతనితో సినిమాని తిరస్కరించిందట. వేరే సినిమాకి డేట్స్ ఇచ్చానని, ఈ చిత్రానికి డేట్స్ ఇవ్వడానికి వీలుపడదని నయనతార తెగేసి చెప్పేసిందని భోగట్టా. సో.. రెండోసారి కూడా విక్రమ్ చిత్రాన్ని నయనతార తిరస్కరించిందని చెప్పొచ్చు. మామూలుగా విక్రమ్ అంటే అది ఖచ్చితంగా పెద్ద సినిమానే. అతని సరసన నటించడానికి కథానాయికలు ఆసక్తి కనబరుస్తారు. నయనతార ఇలా రెండోసారి కూడా విక్రమ్ సినిమాని తిరస్కరించిందంటే.. నిజంగా డేట్స్ లేకపోవడంవల్లా? లేక వేరే ఏదైనా కారణం ఉందా? అని కొంతమంది చర్చించుకుంటున్నారు.