షాకింగ్... అభిమానులను నిరాశపరుస్తున్న అఖిల్!

అక్కినేని అఖిల్ హీరోగా పరిచయం అవుతున్న తొలి సినిమా వి.వి.వినాయక్ దర్శకత్వంలో రూపొందుతోన్న విషయం తెలిసిందే. ఈ సినిమా దసరా కానుకగా విడుదల చేయబోతున్నట్టు అధికారికంగా ప్రకటించేసారు. దాంతో అక్కినేని అభిమానులు ఈ సినిమా కోసం ఆసక్తిగా ఎదురుచూస్తున్నారు. అలాగే రాంచరణ్ హీరోగా రూపొందుతోన్న 'బ్రూస్ లీ' చిత్రం కూడా దసరా కానుకగానే ప్రేక్షకుల ముందుకు తీసుకొస్తున్నామని నిర్మాతలు ప్రకటించారు. దాంతో అఖిల్ తొలి సినిమాకే మెగా హీరో రాంచరణ్ తో పోటీ పడాల్సి వస్తుందని అందరూ భావించారు. కానీ తాజా వార్తల ప్రకారం అఖిల్ సినిమా విడుదల వాయిదాపడే అవకాశముందని తెలుస్తోంది.

సినిమా షూటింగ్, పోస్ట్ ప్రొడక్షన్ కార్యక్రమాలు శరవేగంగానే జరుగుతున్నాయి. కానీ ఈ సినిమా విడుదలను వాయిదా వేయాలనుకుంటున్నారట. నవంబర్ ఫస్ట్ వీక్ కి విడుదల వాయిదా పడిందనే వార్తలు వినిపిస్తున్నాయి. ఎందుకు విడుదల వాయిదా వేసారో తెలియడంలేదుగానీ, రాంచరణ్ చిత్రంతో పోటీపడటం ఇష్టంలేకే అఖిల్ సినిమా విడుదలను వాయిదా వేసారని అందరూ అనుకుంటున్నారు. కానీ రాంచరణ్ సినిమా కూడా విడుదల వాయిదా పడిందని ఫిల్మ్ నగర్ టాక్. మరి ఈ రెండు సినిమాల విడుదల వాయిదా పడటానికి కారణం ఏంటో తెలియాల్సి ఉంది. మొత్తం మీద దసరాకి వస్తారనుకున్న మెగా హీరో, అక్కినేని హీరో వెనకడుగు వేసి అభిమానులను నిరాశపరుస్తున్నారని చెప్పొచ్చు.