బిగ్ సర్ ప్రైజ్ ఇవ్వబోతున్న చిరు, పవన్ కళ్యాణ్?

మెగా ఫ్యాన్స్ కి ఓ మెగా సర్ ప్రైజ్... ఆ సర్ ప్రైజ్ ఇవ్వబోయేది ఎవరో కాదు... స్వయంగా తమ అభిమాన హీరోలు మెగాస్టార్ చిరంజీవి, పవర్ స్టార్ పవన్ కళ్యాణ్. ఈ ఇద్దరూ ఒక వేదికపైన కనబడితేనే మెగాభిమానులు పులకించిపోతారు. ఇప్పుడు ఏకంగా చిరు హీరోగా పవన్ కళ్యాణ్ నిర్మాతగా ఓ సినిమా రూపొందనుందనే వార్త వింటే వీరి ఆనందానికి హద్దే ఉండదు. ఖచ్చితంగా బిగ్ సర్ ప్రైజ్ అవుతుంది. చిరు, పవన్ కాంబినేషన్ కి ఓ క్రేజీ డైరెక్టర్ యాడ్ అవుతున్నాడంటే డబుల్ సర్ ప్రైజ్ ఖాయం. చిరు 150వ సినిమా 'ఖైదీ నెం.150' విడుదల తర్వాత ఇలాంటి ఓ వార్త మెగాభిమానులు వినబోతున్నారని ఫిల్మ్ నగర్ టాక్.

పవన్ కళ్యాణ్ తో మాటల మాంత్రికుడు త్రివిక్రమ్ శ్రీనివాస్ ఓ చిత్రం చేయబోతున్న విషయం తెలిసిందే. ఈ సినిమా వచ్చే యేడాది జనవరిలో ఆరంభమై, జూలై ఫస్ట్ వీక్ కల్లా షూటింగ్ పూర్తి చేసుకుంటుందట. ఆ తర్వాత త్రివిక్రమ్ దర్శకత్వంలో చిరు ఓ సినిమా చేయబోతున్నారని తెలుస్తోంది. ఈ సినిమా వచ్చే యేడాది చివరిలో ఆరంభమవుతుందట. ఈ చిత్రాన్ని పవన్ కళ్యాణ్ తన సొంత బ్యానర్ పవన్ కళ్యాణ్ క్రియేటివ్ వర్క్స్ బ్యానర్ పై నిర్మించబోతున్నాడని ఫిల్మ్ నగర్ టాక్. ఈ సినిమా ఆరంభమయ్యేలోపు చిరు 151వ చిత్రం పూర్తయిపోతుందట. ఈ 151వ చిత్రానికి బోయపాటి శ్రీను దర్శకత్వం వహించబోతున్నారని తెలుస్తోంది. సో... చిరు 152 వ చిత్రాన్ని పవన్ కళ్యాణ్ నిర్మించబోతున్నాడని చెప్పొచ్చు. చిరు, పవన్ కళ్యాణ్, త్రివిక్రమ్ కాంబినేషన్ అంటే... అదిరింది గురూ అనాల్సిందే కదా....!