పూరి దర్శకత్వంలో తమిళ రీమేక్?

పూరి జగన్నాథ్ మంచి దర్శకుడు మాత్రమే కాదు.. మంచి రచయిత కూడా. తాను దర్శకత్వం వహించే చిత్రాలకు తానే కథలు, మాటలు రాసుకుంటాడు. అలాంటిది తొలిసారి ఓ తమిళ చిత్రం తెలుగు రీమేక్ కి దర్శకత్వం వహించనున్నాడని సమాచారం. ఆ తమిళ చిత్రం గురించి చెప్పాలంటే..

శివాజీ గణేశన్ మనవడు, ప్రభు కొడుకు విక్రమ్ ప్రభు హీరోగా నటించిన తమిళ చిత్రం 'అరీమా నంబి' ఇటీవల విడుదలై, ఘనవిజయం సాధించింది. ఈ చిత్రాన్ని కలైపులి థాను నిర్మించారు. 'అరీమా నంబి' ఘనవిజయం సాధించిన నేపథ్యంలో ఈ చిత్రం తెలుగు రీమేక్ హక్కులు పొందడానికి పలువురు తెలుగు నిర్మాతలు ప్రయత్నించారని సమాచారం. కలక్షన్ కింగ్ డా. మోహన్ బాబు కూడా ఈ హక్కులు చేజిక్కించుకోవాలనుకున్నారు. ఇటీవల కలైపులి థానూని ఆయన సంప్రదించారట. మోహన్ బాబు మీద ఉన్న గౌరవంతో ఈ చిత్రం రీమేక్ హక్కుల్ని కలైపులి థాను కాదనుకుండా ఇచ్చేశారు. ఈ చిత్రంలో విష్ణు హీరోగా నటించనున్నాడు. కానీ, ఎవరు దర్శకత్వం వహిస్తారనే చర్చ జరిగింది. ఈ రీమేక్ ని పూరి జగన్నాథ్ దర్శకత్వంలో చేస్తే బాగుంటుందని విష్ణు భావిస్తున్నాడట. ఇటీవల ఈ చిత్రం గురించి పూరీతో విష్ణు సంప్రదింపులు జరిపాడని సమాచారం. త్వరలో ఈ చిత్రానికి సంబంధించిన అధికారిక ప్రకటన వెలువడే అవకాశం ఉంది.

ఒకవేళ పూరి కనుక ఈ చిత్రానికి దర్శకత్వం వహిస్తే.. ఆయన దర్శకత్వం వహించే తొలి రీమేక్ ఇదే అవుతుంది.

Puri Jagannadh to direct 'Arima Nambi' remake?