ఆ ఇద్దరి మధ్య పగ అలానే ఉంది!

సినిమా రంగంలో చాలా పోటీ ఉంటుంది. ఆ పోటీని తట్టుకుని నిలబడటం అంత సులువు కాదు. 'మా మధ్య ఆరోగ్యకరమైన పోటీ ఉంది' అని తారలు అంటుంటారు కానీ.. నిజానికి వృత్తిపరమైన పోటీ కారణంగా అసూయ, ద్వేషంతో రగిలిపోతుంటారు. ఒకప్పుడు శ్రీదేవి, మాధురీ దీక్షిత్ మధ్య అలాంటి అసూయ, ద్వేషమే ఉండేది. హిందీ రంగంలో కథానాయికలుగా వీళ్ల హవా సాగుతున్నప్పుడు ఇద్దరి మధ్య గట్టి పోటీ ఉండేది. దాంతో ఇద్దరికీ ఒకరంటే మరొకరికి పడేది కాదు. సరిగ్గా మాట్లాడుకునేవాళ్లు కాదు. ఆ తర్వాత అసలు మాట్లాడుకోవడమే మానేశారు. ఎప్పుడో 15, 20 ఏళ్ల క్రితం ఇద్దరి మధ్య ఏర్పడిన ఆ పగ ఇప్పటికీ అలానే ఉందని తెలుస్తోంది. అందుకు ఉదాహరణగా ఇటీవల జరిగిన ఓ షోని చెప్పకుందాం...

ఇటీవల జరిగిన ఓ షోలో శ్రీదేవి, మాధురీ దీక్షిత్ తదితర తారలు ర్యాంప్ వాక్ చేశారు. ఆ షోలో శ్రీదేవి, మాధురీ... ఇద్దరూ ఎదుటపడినా సభ్యత కోసం కూడా నవ్వుకోలేదట. మాధురీతో పలకరింపుగా నవ్వాలని శ్రీదేవి ప్రయత్నించిందని పరిశీలకులు అంటున్నారు. కానీ, మాధరీ దీక్షిత్ చూసీ చూడనట్లుగా వ్యవహరించిందని సమాచారం. దాంతో శ్రీదేవి మొహం కందగడ్డలా అయ్యిందట. ఈ తతంగం మొత్తం చూసినవాళ్లు ఏదో వయసులో ఉన్నప్పుడు పోటీ పడ్డారు.. అయిపోయింది. ఇప్పుడు కూడా ఎందుకిలా? అని మాట్లాడుకుంటున్నారు. చూడబోతుంటే.. ఈ ఇద్దరి పగ జన్మ జన్మలకూ సాగేట్లు ఉందని కూడా చెప్పుకుంటున్నారు.