చిరు గురించి మాట్లాడని దాసరిపై గణేష్ ఆగ్రహం!

అల్లు అర్జున్ హీరోగా త్రివిక్రమ్ దర్శకత్వంలో ఎస్. రాధాకృష్ణ నిర్మించిన 'సన్నాఫ్ సత్యమూర్తి' ఆడియో వేడుక నిన్న (15.03.) జరిగిన విషయం తెలిసిందే. ఈ ఆడియో వేడుకలో ముఖ్య అతిథిగా పాల్గొన్న డా. దాసరి నారాయణరావు మాట్లాడిన మాటలు చర్చలకు దారి తీశాయి. ఈ ఫంక్షన్ చూసినవాళ్లకు ఆయన ఏం మాట్లాడారో తెలుసు. ఓసారి ఆ మాటలను రీ కలెక్ట్ చేసుకుందాం.

Bandla Ganesh targets Dasari

''ప్రతి హీరోకీ ఓ స్టయిల్ ఉంటుంది. ఎన్టీఆర్ ది ఒక స్టయిల్.. ఏయన్నార్ ది ఒక స్టయిల్. పవన్ కళ్యాణ్ ది ఒక స్టయిల్. ఆ స్టయిల్ ని హీరోలందరూ కాపీ కొడుతున్నారు. కానీ, అల్లు అర్జున్ మాత్రం ఓ సెపరేట్ స్టయిల్ లో వెళుతున్నాడు. తననే అందరూ కాపీ కొడుతున్నారు'' అని దాసరి నారాయణరావు అన్నారు. ఈ మాటలు నిర్మాత బండ్ల గణేష్ కి ఆగ్రహం తెప్పించినట్లున్నాయి. చిరంజీవి గురించి ఒక్క మాట కూడా మాట్లాడకుండా పవన్ ని అలా పొగిడేయడం గణేష్ కి నచ్చనట్లుంది. ట్విట్టర్లో అతనను పోస్ట్ చేసిన వ్యాఖ్యలు ఈ అభిప్రాయాన్ని కలగజేశాయి. ఇంతకీ గణేష్ ఏం వ్యాఖ్యానించాడో తెలుసుకుందాం...
''రాముడు లేని రామాయణమ్ చదవం. చిరంజీవి పేరు లేని తెలుగు సినిమా ఊసు ఎత్తం. కాలం మారినా గుణం మారని ధ్రువ నక్షత్రం మెగాస్టార్. రామారావుగారు, నాగేశ్వరరావుగారు, కృష్ణగారు తర్వాత స్వయంకృషితో నెంబర్ వన్ అయ్యి, మూడు దశాబ్దాలుగా నిలబడిపోయిన మెగాస్టార్ చిరంజీవి. డాన్సు నేర్చుకోవాలంటే, ఫైట్స్ ప్రాక్టిస్ చెయ్యాలంటే, నడవాలంటే, నిలబడాలంటే చూసే CDs మెగాస్టార్ చిరంజీవిగారివి కాదా. చిరంజీవిలా కష్టపడి పైకి రా అని కొడుకుతో అంటాం. కష్టపడి పైకొస్తాం అని చిరంజీవిగారిని ఆదర్శంగా తీసుకుంటాం. Boxoffice ni redifine చేసిన మెగాస్టార్ చిరంజీవి. సైకిల్ స్టాండ్ ఎంప్లాయి నుంచి నెంబర్ వన్ ప్రొడ్యూసర్ దాకా ఎదురుచూసే సినిమా మెగాస్టార్ సినిమా. ఈ పేటకు ఆయనే మేస్త్రి. కొడితే ఆయనే సిక్సు కొట్టాలి. ఆయనకి అభిమానం పంచిన తమ్ముళ్ళం మనం. మెగాస్టార్ జిందాబాద్. జై చిరంజీవ!! జై చిరంజీవ! చిరంజీవ చిరంజీవ సుఖీభవ సుఖీభవ!!!'' అని బండ్ల గణేష్ ట్విట్టర్లో పెట్టాడు. చిరంజీవి మీద ఉన్న అభిమానం చూపించడానికే గణేష్ ఇలా పెట్టి ఉంటాడనుకోవచ్చు. కానీ, నిన్న ఆడియో వేడుకలో చిరంజీవి పేరు ఎత్తకుండా దాసరి మాట్లాడిన నేపథ్యంలో గణేష్ ఇలాంటి వ్యాఖ్యలు చేశాడంటే.. ఖచ్చితంగా దాసరి మాటలను మనసులో పెట్టుకునే చేసి ఉంటాడన్నది పలువురి అభిప్రాయం.