తాప్సీకి అక్కగా మారింది!

ప్రతి ఆర్టిస్టుకూ జీవితాంతం చెప్పుకోదగ్గ సినిమా ఒక్కటైనా ఉంటుంది. అదృష్టం బాగున్నవారికైతే పది, ఇరవై, యాభై.. ఇలా బోల్డన్ని సినిమాలుంటాయి. సోనియా అగర్వాల్ కి మాత్రం అలా జీవితాంతం చెప్పుకోదగ్గ సినిమా ఒకే ఒక్కటుంది. అది '7/జి బృందావన కాలనీ' చిత్రం అని ప్రత్యేకంగా చెప్పక్కర్లేదు. ఆ చిత్రంలో సోనియా అందాన్ని, నటనను ఎప్పటికీ మర్చిపోలేం. ఆ చిత్రం అప్పుడే చిత్రదర్శకుడు సెల్వరాఘవన్ ని ప్రేమించింది సోనియా. ఆ తర్వాత ఇద్దరూ పెళ్లి చేసుకోవడం, విడిపోవడం తెలిసిందే. పెళ్లయినప్పుడు సోనియా సినిమాలు మానుకోవడంతో కెరీర్ పడిపోయింది. ఆ తర్వాత సెకండ్ ఇన్నింగ్స్ మొదలుపెట్టింది. ప్రస్తుతం చెప్పకోదగ్గ పాత్రలు చేయకపోయినా.. ఒకటీ, అరా సిినిమాలకు అవకాశం దక్కించుకుంటోంది. ఇప్పుడు ఏకంగా తాప్సీకి అక్కగా నటించడానికి గ్రీన్ సిగ్నల్ ఇచ్చింది.

తిరు సరసన తాప్సీ ఓ తమిళ చిత్రంలో నటిస్తోంది.. త్రిషతో నిశ్చితార్థం జరిగిన వరుణ్ మణియన్ ఈ చిత్రానికి నిర్మాత. ఈ చిత్రంలో అసలు త్రిషనే కథానాయికగా నటించాల్సి ఉంది. కానీ, తప్పుకుంది. దాంతో తాప్సీని తీసుకున్నారు. అలాగే, అక్క పాత్రకు సిమ్రాన్ ని అడిగారు. అయితే తను దర్శక, నిర్మాతగా చేయాలనుకుంటోంది కాబట్టి, అంగీకరించలేదు. ఈ నేపథ్యంలోనే సోనియా అగర్వాల్ ను అక్క పాత్రకు అడిగారట. ఈ పాత్ర బాగుండటంతో సోనియా గ్రీన్ సిగ్నల్ ఇచ్చింది. అక్క పాత్ర అయినప్పటికీ సినిమాకి కీలకంగా నిలుస్తుందట.