శేఖర్ కమ్ములకు చుక్కలు చూపిస్తున్న నయనతార!

మలయాళ భామ నయనతార స్టార్ హీరోయిన్ గా ఎదగడానికి కారణం తెలుగు పరిశ్రమ. లక్ష్మీ, బాస్, తులసి, శ్రీరామరాజ్యం, కష్ణం వందే జగద్గురుమ్... ఇలా తెలుగులో వచ్చిన అవకాశాలను బాగానే క్యాష్ చేసుకుంది నయనతార. తన పారితోషికం కోటి రూపాయల వరకు పెరగడానికి కారణం తెలుగు నిర్మాతలు. అలాంటిది తెలుగు పరిశ్రమ పట్ల నయనతారకు కొంచెం కూడా స్పెషల్ ఫీలింగ్ ఏదీ లేదనిపిస్తోంది. సినిమాల్లో నటించడం వరకే నా బాధ్యత.. ప్రమోషనల్ కార్యక్రమాల్లో పాల్గొననని ఖరాకండిగా చెప్పేస్తోందట. కానీ, ఆ మధ్య విడుదలైన తమిళ చిత్రం 'రాజా రాణి' ప్రచార కార్యక్రమాల్లో పాల్గొంది. అయితే, శేఖర్ కమ్ముల దర్శకత్వంలో నటించిన 'అనామిక' చిత్రం ప్రమోషన్ లో మాత్రం పాల్గొనడానికి సుముఖుత వ్యక్తపరచడంలేదట నయనతార. ప్రమోషన్ విషయమై నయనతారతో మాట్లాడటానికి శేఖర్ ఫోన్ చేస్తే.. 'షాట్ లో ఉన్నారు' అని ఎవరో సమాధానం చెబుతున్నారని సమాచారం. ఎన్నిసార్లు ఫోన్ చేసినా ఇదే సమధానం వస్తోందనే టాక్ ఉంది. ఈ చిత్రానికి నయనతార భారీగానే పారితోషికం తీసుకుందని వినికిడి. ఒకవేళ భారీగా తీసుకోకపోయినా, సినిమాని ప్రచారం చేయాల్సిన బాధ్యత తన మీద ఉంది. ఆ బాధ్యతను నయనతార విస్మరించడం సరికాదు. తన గురించి తెలిసినవాళ్లు నయనతార చాలా 'కమర్షియల్' అంటుంటారు. అదనంగా డబ్బు ఇస్తే అప్పుడు ప్రమోట్ చేయడానికి రెడీ అవుతుందనే టాక్ ఉంది. తనకు మంచి బ్రేక్ ఇచ్చిన తెలుగు పరిశ్రమపై చిన్న చూపు, తెలుగు పరిశ్రమ గుర్తంచిన తర్వాత భారీ అవకాశాలివ్వడం మొదలుపెట్టిన తమిళ పరిశ్రమపై పెద్ద చూపు చూడటం ఈ మలయాళ భామకు తగదేమో.