విక్రమ్ ని వాయించేసిన త్రిష, ఆమె తల్లి!

విక్రమ్ హీరోగా ధరణి దర్శకత్వంలో ఓ చిత్రం రూపొందనుంది. ఈ చిత్రానికి 'రాస్కెల్' అనే టైటిల్ ఖరారు చేశారని సమాచారం. కాగా, ఇందులో తనని కథానాయికగా తీసుకుంటారని త్రిష ఊహించిందట. 'సామి', 'భీమ' చిత్రాల్లో విక్రమ్ సరసన నటించింది త్రిష. అలాగే, ఈ ఇద్దరూ కలిసి యాడ్స్ లో కూడా చేశారు. దానివల్ల విక్రమ్ తనకే ప్రిఫరెన్స్ ఇస్తాడని నమ్మింది త్రిష. అయితే, ఆ నమ్మకం వమ్మయ్యింది. ఈ చిత్రంలో హన్సికను కథానాయికగా ఎంపిక చేశారట. వాస్తవానికి గతంలో విక్రమ్ సరసన ఓ చిత్రంలో నటించే అవకాశం వస్తే, డేట్స్ ఖాళీ లేవని హన్సిక ఒప్పుకోలేదు. అందుకని, 'రాస్కెల్' సినిమా గురించి తెలుసుకుని, తనే స్వయంగా విక్రమ్ తో మాట్లాడి ఈ సినిమాలో కథానాయికగా చేస్తానని హన్సిక చెప్పిందనే వార్త ప్రచారంలో ఉంది. విక్రమ్ కూడా హన్సికకు గ్రీన్ సిగ్నల్ ఇవ్వడంతో చిత్రదర్శకుడు ధరణి ఆమెనే ఖరారు చేశాడని కోలీవుడ్ టాక్. ఈ సినిమా చేజారినందుకు తెగ బాధపడిపోయిన త్రిష స్వయంగా విక్రమ్ కి ఫోన్ చేసి, చెడామడా వాయించేసిందని సమాచారం. అది మాత్రమే కాదు.. త్రిష తల్లి ఉమాకృష్ణన్ కూడా విక్రమ్ కి ఫోన్ చేసి ఆగ్రహం వ్యక్తం చేసిందట. దీన్నిబట్టి 'రాస్కెల్' చేజారినందుకు ఈ తల్లీకూతుళ్లు ఎంత ఫీలయి ఉంటారో అర్థం చేసుకోవచ్చు. ఇదిలా ఉంటే 'దిల్', 'ధూల్' వంటి హిట్ చిత్రాల తర్వాత విక్రమ్, ధరణి దర్శకత్వంలో రూపొందనున్న ఈ 'రాస్కెల్'పై భారీ అంచనాలు ఉన్నాయి. ఈ మధ్య కాలంలో ఇటు విక్రమ్ అటు ధరణికి సరైన విజయాలు లేవు. దాంతో ఈ హిట్ కాంబినేషన్ హిట్ కొడతారనే అంచనాలు ఉన్నాయి.