తమ్ముడిని లేట్ నైట్ లో కలిసిన అన్నయ్యలు!

తమ్ముడు పవన్ కళ్యాణ్  రాజకీయాల గురించి, కొత్త పార్టీకి సంబంధించి, రాజకీయాలపై తనకున్న అభిప్రాయాల గురించి మీడియా సమావేశం ఏర్పాటు చేసి వెల్లడిస్తానని ప్రకటించిన దగ్గర్నుంచి మెగా బదర్స్ నిద్రలేని రాత్రులు గడుపుతున్నారట. అసలు తమ్ముడు ఏం చెప్పబోతున్నాడోనని చిరంజీవి, నాగబాబు సైతం కామన్ ప్రేక్షకుల్లా తలలు పట్టుకున్నారట. ఈ టెన్షన్ పడే బదులు తమ్ముడిని ఓసారి కలిసి అన్ని విషయాలు మాట్లాడేస్తే బెటర్ అని భావించారట ఈ అన్నయ్యలు. నిన్న (5.3)  బాగా పొద్దుపోయిన తర్వాత తమ్ముడు పవన్ కళ్యాణ్ ఇంటికి అన్నయ్యలిద్దరూ వెళ్ళారని సమాచారమ్. వీరి మధ్య చాలా చర్చలు జరిగాయని, అన్నయ్యలు ఇచ్చిన సూచనలను పరిగణనలోకి తీసుకుంటానని ఈ తమ్మయ్య చెప్పాడని సమాచారమ్. ప్రజా కవి గద్దర్ కూడా పవన్ ని కలిసాడు. దీంతో పవన్ కళ్యాణ్ తన రాజకీయ అరంగేట్రం గురించి ఏదో బలమైన నిర్ణయమే తీసుకున్నాడని జనాలు భావిస్తున్నారు. కానీ పవన్ని గద్దర్ కలిసింది ఓ సినిమాకి సంబంధించి చర్చించడానికేననే వార్తలు కూడా వినబడుతున్నాయి. తెలంగాణా పోరాటంలో పాల్గొన్న ప్రముఖ వ్యక్తి జీవితాన్ని ఆధారంగా తీసుకుని దిల్ రాజు ఓ సినిమా చేయాలనుకుంటున్నాడట. ఆ సినిమాకి సంబంధించే పవన్ తో గద్దర్ చర్చించాడని కొంతమంది అంటున్నారు. కానీ గద్దర్ లాంటి వ్యక్తితో పవన్ ఖచ్చితంగా ప్రస్తుత రాజకీయాల గురించి, తన పొలిటికల్ ఎంట్రీకి సంబంధించి మాట్లాడే ఉంటాడని మరికొంతమంది అంటున్నారు. ఏదేమైనా మరో నాలుగు రోజులు ఆగితే అన్ని విషయాలకు సంబంధించి క్లారటీ వచ్చేస్తుంది కాబట్టి అప్పటివరకూ ఎవరికి తోచింది వారు ఊహించేసుకుందాం.