మెగా హీరోనే దిల్ రాజు లవ్వరా?

దిల్ రాజుకు హీరోలందరూ లవర్సే. ఎందుకంటే అతని బ్యానర్ లో సినిమాలు చేసిన ప్రతి హీరోకి మంచి పేరు వచ్చింది. ఇక అతని బ్యానర్ లో సినిమా చేయని హీరో అయితే... ఎప్పుడు తమకు ఆ అవకాశం వస్తుందా అని ఎదురు చూస్తారని చెప్పడం అతిశయోక్తి కాదు. అలాంటి దిల్ రాజుకు గత కొంతకాలంగా తన 'లవర్' సినిమా కోసం హీరో దొరకలేదు. 'జోష్' ఫేం వాసూవర్మ చెప్పిన ఓ లవ్ స్టోరీ దిల్ రాజుకు బాగా నచ్చి ఈ సినిమా చేయడానికి ప్లానింగ్ మొదలుపెట్టాడు. ముందుగా అల్లు అర్జున్ తో ఈ సినిమా చేయాలనుకున్నాడు దిల్ రాజు. కానీ ఈ పాత్రకు పెద్దగా ఇమేజ్ లేని హీరో అయితే బెటర్ అని డైరెక్టర్ వాసూ వర్మ చెప్పడంతో దిల్ రాజు ఆ ప్రయత్నాన్ని మానుకున్నాడు. తాజాగా వాసూవర్మ చెప్పిన కథకు సాయిధరమ్ తేజ యాఫ్ట్ గా ఉంటాడని భావించి అతనితో ఈ సినిమా నిర్మించడానికి దిల్ రాజు సమాయత్తమవుతున్నాడట. ఈ చిత్రానికి 'లవర్' టైటిల్ ని ఖరారు చేసారు. సాయిధరమ్ తేజను హీరోగా పరిచయం చేస్తూ వై.వి.యస్.చౌదరి స్వీయదర్శకత్వంలో రూపొందిన 'రేయ్' చిత్రం ఇంకా విడుదలవ్వలేదు. అయినా సరే రెండో సినిమాగా 'పిల్లా నువ్వు లేని జీవితం' చేస్తున్నాడు సాయిధరమ్ తేజ. ఈ చిత్రాన్ని రవికుమార్ చౌదరి దర్శకత్వంలో అల్లు అరవింద్, దిల్ రాజు నిర్మిస్తున్నారు. ఈ చిత్రం లొకేషన్ లో సాయిధరమ్ తేజను పరిశీలిస్తున్న దిల్ రాజు, 'లవర్' కథకు సాయిధరమ్ తేజనే పర్ ఫెక్ట్ అని ఫిక్స్ అయ్యాడట. త్వరలోనే ఈ చిత్రం ఆరంభంకానుందని సమాచారమ్. తొలి, మలి సినిమాలు విడుదలవ్వకముందే ఈ మెగా హీరోకి మూడో సినిమా అవకాశం వచ్చిందంటే అతనెంత జోష్ మీదుంటాడో ఊహించుకోవచ్చు.