ఇంటర్వ్యూ - డైరెక్టర్ మారుతి

''యువతతో పాటు కుటుంబ ప్రేక్షకులు కూడా చూడాలనే ఆకాంక్షతో చేసిన సినిమా 'కొత్త జంట'. నా టార్గెట్ నెరవేరింది'' అన్నారు మారుతి. అల్లు శిరీష్, రెజీనా జంటగా మారుతి దర్శకత్వంలో అల్లు అరవింద్ సమర్పణలో బన్నీ వాసు నిర్మించిన చిత్రం 'కొత్త జంట'. ఈ చిత్రం విడుదలై నేటి (14.05.)తో రెండు వారాలు పూర్తయ్యింది. ఈ సందర్భంగా మారుతి తన మనోభావాలను ఈ విధంగా పంచుకున్నారు.

రేపట్నుంచి లాభాల బాటలో 'కొత్త జంట'
ఈ సినిమా విడుదలైన రెండు వారాలకు ఇలా పాత్రికేయులను కలవడానికి కారణం ఉంది. జెన్యూన్ రిపోర్ట్ తో నా మనోభావాలు పంచుకోవాలనుకున్నాను. ఇప్పుడు రెండు వారాలు పూర్తయ్యింది. వసూళ్లు బాగున్నాయి. రేపట్నుంచి లాభాలు అందుతాయి. పంపిణీదారులందరూ ఈ సినిమా విషయంలో పూర్తి సంతృప్తితో ఉన్నారు. మారుతి సినిమా అంటే ఇలానే ఉంటుంది? అనుకున్నవారిని ఈ సినిమా ఆశ్చర్యపరిచింది. వారి ఊహలకు భిన్నంగా ఉంది. నా గత చిత్రాల స్థాయిలో కామెడీ ఉంటుందని ఆశించారు. కానీ, ఈ కథలో అంత కామెడీ లేదు. యువతతో పాటు కుటుంబ ప్రేక్షకులు చూడాలనే ఆశయంతో ఈ సినిమా చేశాను. మొన్నటి వరకు యువత చూశారు. ఇప్పుడు కుటుంబ ప్రేక్షకులు కూడా చూస్తున్నందుకు ఆనందంగా ఉంది.

బి,సి సెంటర్స్ లో కూడా...
ఇందులో హీరో స్వార్థపరుడు. 'సెల్ ఫిష్' అనే పదం వాడటంవల్ల బి,సీ సెంటర్స్ వాళ్లు పెద్దగా కనెక్ట్ కారనుకున్నారు. కానీ ఏలూరు, తాడేపల్లిగూడెం, తణుకు లాంటి ఏరియాల్లోనూ ఈ సినిమాని ఆదరిస్తున్నందుకు ఆనందంగా ఉంది. క్లీన్ సినిమా కావడంతో కుటుంబ ప్రేక్షకులు కూడా ఎంజాయ్ చేస్తున్నారు.

తెలివిగా తీశానని చరణ్ అన్నాడు
విడుదలకు ముందు ఈ సినిమాని రామ్ చరణ్ చూశాడు. చిన్నప్పట్నుంచీ తను నాకు తెలుసు. మేమిద్దరం కలిసి సినిమాలు కూడా చూసేవాళ్లం. 'కొత్త జంట' సినిమాని తను చూసి, 'భలే తెలివిగా తీశావు' అన్నాడు. బన్నీకి కూడా ఈ సినిమా బాగా నచ్చింది.

వేసవిలో అల్లుకి ఆనందం...
వేసవిలో విడుదలైన అల్లు అర్జున్ 'రేసు గుర్రం', అల్లు శిరీష్ 'కొత్త జంట' రెండూ హిట్ అయ్యాయి. ఆనందంగా ఉంది. మామూలుగా మెగా హీరోల సినిమాలంటే రెండు, మూడు రోజులు అభిమానులు చూస్తారు. సినిమా బాగుంటే ఆ తర్వాత ఇతర ప్రేక్షకులు కూడా చూస్తారు. 'రేసు గుర్రం'లో బన్నీ ఎనర్జిటిక్ పర్ఫా ర్మెన్స్ అందరికీ నచ్చింది. 'కొత్త జంట'లో శిరీష్ బాగున్నాడంటున్నారు. నటుడిగా ప్రేక్షకులు తనను పాస్ చేశారు.

వెంకటేష్ 'రాధ' అందుకే ఆగింది!
వెంకటేష్ హీరోగా 'రాధ' చిత్రం రూపొందించాల్సి ఉంది. అయితే, కథ రెడీ కావడానికి ఇంకా టైమ్ పట్టేట్లుంది. అప్పటికే వెంకటేష్ నాలుగు నెలల వెయిట్ చేశారు. ఇంకా వెయిట్ చేయించడం భావ్యం కాదనిపించింది. కథ కు ఇంకా టైమ్ పడుతుందన్నాను. అందుకే, ఆయన 'దృశ్యం' కమిట్ అయ్యారు. నితిన్ కి ఓ స్టోరీ లైన్ చెప్పాను. తనకు నచ్చింది. అలాగే ప్రస్తుతం రెండు, మూడు కథలు తయారు చేస్తున్నాను. నా తదుపరి చిత్రం ఏంటి? అనేది త్వరలో తెలియజేస్తా.