బాలయ్య సినిమాకి శాంతిపూజ!

పౌరాణిక, జానపద, సాంఘిక.. ఇలా ఏ తరహా చిత్రంలోనైనా నటించగల సత్తా నందమూరి బాలకృష్ణకు ఉంది. గతంలో తన దర్శకత్వంలోనే బాలకృష్ణ 'నర్తనశాల' చిత్రం మొదలుపెట్టిన విషయం తెలిసిందే. ఈ చిత్రంలో అర్జునుడి పాత్రను కూడా ఆయనే పోషించాలనుకున్నారు. ద్రౌపది పాత్రకు సౌందర్యను ఎంపిక చేశారు. ఈ చిత్రం ఆరంభించిన తర్వాత పరిస్థితులు అనుకూలించకపోవడంతో అర్థాంతరంగా ఆపేశారు. విమాన ప్రమాదంలో సౌందర్య దుర్మరణంపాలైన విషయం తెలిసిందే. ఆ తర్వాత బాలయ్య కూడా ఈ చిత్రాన్ని ముందుకు తీసుకెళ్లేకపోయారు. ఇప్పుడు ఓ ప్రముఖ నిర్మాత ఈ చిత్రాన్ని నిర్మించాలనుకుంటున్నారట. 'శ్రీరామరాజ్యం'కి మంచి ఆదరణ లభించిన నేపథ్యంలో 'నర్తనశాల'కి ఆదరణ లభిస్తుందని భావిస్తున్నారట. బాలయ్య కూడా ఈ సినిమా చేయాలని ఆసక్తిగా ఉన్నారని సమాచారం. అయితే, అప్పట్లో 'నర్తనశాల' ని ఆరంభించినప్పుడు జరగకూడని సంఘటనలు జరిగాయి కాబట్టి, శాంతి పూజలు జరిపించిన తర్వాతే ఈ చిత్రాన్ని ప్రారంభించాలనుకుంటున్నారట. ఒకవేళ ఈ చిత్రం షూటింగ్ పట్టాలెక్కితే ద్రౌపదిగా ఎవరు బాగుంటారు? అనే చర్చ జరుగుతోంది. ఎక్కువ శాతం మంది నయనతార పేరు చెబుతున్నారు. సింహా' తర్వాత బాలకృష్ణ సరసన నయనతార 'శ్రీరామరాజ్యం' చిత్రంలో నటించిన విషయం తెలిసిందే. అటు రెగ్యులర్ కమర్షియల్ మూవీ ఇటు జానపద చిత్రంలో ఈ జంట చూడచక్కగా అనిపించింది. అందుకే 'నర్తనశాల'లో నటించే చాన్స్ ఎక్కువ శాతం నయనతారకే ఉందని పరిశీలకులు అంటున్నారు.

Shanthi pooja for Balakrishna cinema