ఎన్టీఆర్ నెక్ట్స్ సినిమాకి డైరెక్టర్ ఫిక్స్ అయినట్టేనా?

యంగ్ టైగర్ ఎన్టీఆర్ హీరోగా రూపొందిన 'జనతాగ్యారేజ్' చిత్రం ఈ రోజు ప్రపంచ వ్యాప్తంగా ఘనంగా విడుదలయ్యింది. ఈ చిత్రం తర్వాత పెద్ద గ్యాప్ తీసుకోకుండానే ఎన్టీఆర్ తదుపరి సినిమా ఆరంభమవుతుందని అందరూ భావించారు. ఎందుకంటే ఆల్ రెడీ స్టోరీ, డైరెక్టర్, నిర్మాత అన్నీ ఫిక్స్. రైటర్ వక్కంతం వంశీ చెప్పిన కథ నచ్చడంతో ఆయన దర్శకత్వంలో సినిమా చేయడానికి ఎన్టీఆర్ ఎప్పుడో గ్రీన్ సిగ్నల్ ఇచ్చేసాడు. ఈ సినిమాని ఎన్టీఆర్ అన్నయ్య నందమూరి కళ్యాణ్ రామ్ భారీ బడ్జెట్ తో భారీగా నిర్మించడానికి సన్నాహాలు చేస్తున్నాడనే వార్తలు ఉన్నాయి. దాంతో ఎన్టీఆర్, వక్కంతం వంశీ సినిమా వెంటనే ట్రాక్ ఎక్కేస్తుందని అందరూ ఫిక్స్ అయిపోయారు. అయితే ఈ ప్రాజెక్ట్ ని పక్కన పెట్టేసి వేరే ప్రాజెక్ట్ ని ఫైనలైజ్ చేయాలనే ఆలోచనలో ఎన్టీఆర్ ఉన్నట్టు తెలుస్తోంది.

డైరెక్టర్ పూరి జగన్నాధ్ ఆ మధ్య ఎన్టీఆర్ కి ఓ కథ చెప్పాడు. ఈ కథ ఎన్టీఆర్ కి బాగా నచ్చిందట. ప్రస్తుతం ఈ కథతో పూరి దర్శకత్వంలో సినిమా చేయాలనే ఆలోచనలో ఎన్టీఆర్ ఉన్నాడని సమాచారమ్. ఈ సినిమాని ఎన్టీఆర్ ఆర్ట్స్ బ్యానర్ పై నందమూరి కళ్యాణ్ రామ్ లేదా, బి.వి.యస్.యన్.ప్రసాద్, కె.యస్.రామారావు ల్లో ఎవరో ఒకరు నిర్మించే అవకాశముందని ఫిల్మ్ నగర్ టాక్. ఓ చిన్నపాటి బ్రేక్ తీసుకుని, అనంతరం తన తదుపరి ప్రాజెక్ట్ కి సంబంధించి అధికారికంగా ప్రకటించాలనుకుంటున్నాడట ఎన్టీఆర్. ఆలోపు నందమూరి కళ్యాణ్ రామ్ తో పూరి జగన్నాధ్ చేస్తున్న 'ఇజం' చిత్రం విడుదలైపోతుంది. అనంతరం ఎన్టీఆర్, పూరి సినిమా ఆరంభమవుతుందని విశ్వసనీయమైన సమాచారమ్.