శింబు, నయనతార సినిమా ఆగిందా?

ఒకప్పుడు ఘాటుగా ప్రేమించుకుని, నలుగురి దృష్టిలో పడ్డారు శింబు, నయనతార. అనంతరం విడిపోయిన విషయం తెలిసిందే. విడిపోయిన తర్వాత కలిసి సినిమాలు చేయడం మానేశారు. దాదాపు ఏడేళ్ల తర్వాత ఈ ఇద్దరూ కలిసి నటించడానికి గ్రీన్ సిగ్నల్ ఇచ్చిన చిత్రం 'ఇదు నమ్మ ఆళు'. చాలకాలం తర్వాత శింబు, నయనతార జంట తెరపై కనిపించనున్న చిత్రం కాబట్టి, ఈ చిత్రంపై భారీ అంచనాలు నెలకొన్నాయి. స్వీయదర్శకత్వంలో ఈ చిత్రాన్ని నిర్మించాలనుకున్నారు పాండిరాజ్. కానీ, ఈ చిత్రకథ బాగా నచ్చడంతో తాను కూడా ఓ నిర్మాతగా వ్యవహరిస్తానని శింబు అన్నాడట. పాండిరాజ్ కూడా అందుకు సమ్మతించాడని సమాచారం. కానీ, అలా ఒప్పుకోవడమే పాండిరాజ్ ని ఇరుకుల్లో పడేసిందని చెన్నయ్ టాక్. ఈ చిత్రానికి ఇప్పటివరకు 3 కోట్లకు పైగా పెట్టాడట పాండిరాజ్. తదుపరి షెడ్యూల్స్ కి శింబూని డబ్బు పెట్టమని కోరాడట. కానీ, డబ్బు మాటెత్తితే శింబు మౌనం వహిస్తున్నాడని భోగట్టా. ఈ నేపథ్యంలో శింబు తండ్రి టి. రాజేందర్ ని అడిగితే, సినిమాల్లో మాట్లాడినట్లుగా నాలుగైదు పంచ్ డైలాగులు మాట్లాడి అసలు విషయాన్ని దాటేస్తున్నాడట. దాంతో విసుగు చెందిన పాండిరాజ్ ఈ సినిమాని పట్టించుకోవడం మానేశాడట. ఆ కారణంగా ప్రస్తుతం ఈ చిత్రం షూటింగ్ జరగడంలేదని సమాచారం. కాగా, శింబు సన్నిహితులు అతన్ని ఈ సినిమా గురించి అడిగితే.. సూర్య నిర్మాణంలో సినిమా చేసే అవకాశం వచ్చినందున పాండిరాజ్ ఈ సినిమాని పట్టించుకోవడం మానేశాడని చెబుతున్నాడట.

మరి.. నిజమేంటో 'ఇదు నమ్మాళు' యూనిట్ కే ఎరుక.

Simbhu, Nayanthara Movie Shooting Stopped