'పోరా పోవే' మెసేజ్ ఆలోచింపజేస్తుంది - డైరెక్టర్ లంకలపల్లి శ్రీనివాస్

యస్.వి.మూవీ మేకర్స్ బ్యానర్ పై కరణ్, సౌమ్య సుకుమార్ లను హీరో, హీరోయిన్ లుగా పరిచయం చేస్తూ యెల్కిచర్ల వీరేంద్రరెడ్డి, శ్రీనివాస్ బింగమళ్ళ నిర్మాతలుగా... బెట్టింగ్ బంగార్రాజు, పూలరంగడు రచయిత లంకపల్లి శ్రీనివాస్ దర్శకత్వంలో రూపొందిన చిత్రం పోరా పోవే. ఈ చిత్రం ఈ నెల 18న ప్రేక్షకుల ముందుకు రానుంది. ఈ సందర్భంగా ఈ చిత్రం డైరెక్టర్ లంకలపల్లి శ్రీనివాస్ ఈ సినిమా గురించి మీడియాతో ముచ్చటించారు. ఆ విశేషాలు మీ కోసం...

ఈ సినిమా గురించి చెప్పండి?

ఇంటర్ చదువుకుంటున్న అబ్బాయిలు, అమ్మాయిల నేపధ్యంతో తెరకెక్కిన చిత్రం ఇది. యూత్ ఫుల్ ఎంటర్ టైనర్. ఇలాంటి జోనర్ సినిమాలు చాలానే వచ్చాయి. కానీ ఈ సినిమా ఖచ్చితంగా అందరికీ నచ్చే చిత్రం అవుతుంది. అవుట్ ఫుట్ చూసాం. అందరం పూర్తి సంతృప్తికరంగా ఉన్నాం.

టైటిల్ పై ఎలాంటి స్పందన వచ్చింది?

ఈ టైటిల్ ప్రకటించగానే అందరి నుంచి మంచి స్పందన వచ్చింది. టైటిల్ చాలా క్యాచీగా ఉందని అందరూ చెప్పారు. కథకు యాఫ్ట్ అయిన టైటిల్ ఇది. మంచి టైటిల్ దొరకడం పట్ల మేమందరం హ్యాపీగా ఉన్నాం.

ఈ సినిమాలో ఏదైనా మెసేజ్ ఉందా?

అవును ఎంటర్ టైన్ మెంట్ తో పాటు ఈ సినిమాలో మంచి మెసేజ్ కూడా ఉంది. ఆడియన్స్ ని ఆలోచింపజేసే విధంగా ఆ మెసేజ్ ఉంటుంది. సినిమా చూసిన ఆడియన్స్ ని ఈ మెసేజ్ హాంట్ చేస్తుంది.

విజువల్ గా ఈ సినిమా ఎలా ఉంటుంది?

చాలా గ్రాండ్ గా ఉంటుంది. నేను యం.యస్.సి చేసిన నాగార్జున యూనివర్శిటీలో 22రోజుల పాటు ఈ చిత్రం షూటింగ్ చేసాం. నేను చదువుకున్న కాలేజ్ లో షూటింగ్ చేస్తుంటే చాలా సంతోషమేసింది. నన్ను వింత అనుభూతికి గురి చేసింది.

ఈ సినిమా హైలెట్స్ గురించి చెప్పండి?

సిజీ, టెక్నికల్ వ్యాల్యూస్ ఉన్న చిత్రం ఇది. పేపర్ రాకెట్ ని డిజైన్ చేసాం. ఈ సినిమాకి ఇవన్ని హైలెట్ గా నిలుస్తాయి. కథ కూడా ఈ సినిమాకి హైలెట్ గా నిలుస్తుంది.

ఈ సినిమాలో నటీనటుల గురించి?

ఈ సినిమాలో 20మంది కొత్త వారు నటించారు. అమ్మాయిలు, అబ్బాయిలు అనగానే డబుల్ మీనింగ్ డైలాగులతో సినిమా ఉంటుందనుకుంటారు. కానీ ఈ సినిమా అలా ఉండదు. వయసు తారతమ్యం లేకుండా అందరికీ ఈ సినిమా నచ్చుతుంది. ఈ సినిమాలో హీరో, హీరోయిన్ పాత్రలు తమ పక్కంటి అమ్మాయి, అబ్బాయిని చూసినట్టుగా ఉంటుంది.

సంగీత దర్శకుడు గురించి?

యాజమాన్య చక్కటి ట్యూన్స్ ఇచ్చారు. ఆ ట్యూన్స్ కి చంద్రబోస్ గారి విలువైన సాహిత్యం తోడవ్వడంతో పాటలన్ని చక్కగా కుదిరాయి. ఆడియోకి మంచి స్పందన వచ్చింది.

చిత్ర నిర్మాతల గురించి చెప్పండి?

నన్ను నమ్మి ఈ సినిమా చేసే అవకాశం ఇచ్చిన నా నిర్మాతలకు ఈ సందర్భంగా కృతజ్ఞతలు తెలియజేస్తున్నాను. ఎక్కడా కాంప్రమైజ్ అవ్వకుండా సినిమాని నిర్మించారు. వారు నా మీద పెట్టుకున్న నమ్మకం వమ్ము అవ్వదు.

ఎన్ని ధియేటర్స్ లో ఈ చిత్రం విడుదలవుతోంది?

''ఈ నెల 18న 100 ధియేటర్స్ లో ఈ చిత్రం విడుదలవుతోంది. సినిమా రిజల్ట్ చాలా పాజిటివ్ గా ఉంటుందనే నమ్మకం ఉంది. ఈ సినిమా రిజల్ట్ పట్ల పూర్తి బాధ్యత నాదే'' అని ఇంటర్వ్యూకు ముగింపు పలికారు డైరెక్టర్ లంకలపల్లి శ్రీనివాస్.

Lankalapalli Srinivas Speaks about Pora Povae